पुणे : पुण्यातील फोटोग्राफी सायकल क्लब ही संस्था पर्यावरणाच्या अनेक प्रश्नांवर सातत्याने काम करत आहे. याचाच एक भाग म्हणून वटपौर्णिमेचे औचित्य साधून संस्थेतर्फे सहकारनगर येथील पद्मावती माता मंदिरात जनजागृतीचा कार्यक्रम घेण्यात आला. वटपौर्णिमेच्या दिवशी वडाच्या झाडांच्या फांद्या मोठ्या प्रमाणात तोडल्या जातात. म्हणूनच वडाची पूजा का करतात, त्यामागील शास्त्रीय कारण काय, झाडे आपणास काय देतात व आपण काय करायला हवे याची शास्त्रीय माहिती संस्थेतर्फे येथील महिलांना समजावून सांगण्यात आली. या दिवशी फोटोग्राफी सायकल क्लब संस्थेतर्फे ५० महिलांना वडाची रोपे वाटण्यात आली. त्यांच्या संगोपनाची प्रतिज्ञा करून महिलांनी खऱ्या अर्थाने वटपौर्णिमा साजरी केली.
या वेळी फोटोग्राफी सायकल क्लब संस्थेचे अनिल व आशालता साळवी, चेतन साळुंके, तेजस्विनी थिटे, लोकेश व जान्हवी बापट यांच्यासह संस्थेचे कार्यकर्ते सहभागी झाले होते.
नदी-नाले स्वच्छता, वृक्षारोपण व संवर्धन याकरिता जनजागृती, प्लास्टिक कचरा निर्मूलन व स्वच्छता अभियान, सौर यंत्रणा व त्याचे महत्त्व लोकांना सांगणे, ओला कचरा जिरवण्याचे तंत्रज्ञान, अशी अनेकविध पर्यावरणपूरक कामे संस्था गेली अनेक वर्षे करत आहे. संस्थेत अनेक कार्यकर्ते श्रमदान म्हणून काम करत आहेत.